ກສວ ແມ່ນ ກົມວິຊາການໜຶ່ງ ສັງກັດໃນໂຄງປະກອບກົງຈັກການຈັດຕັ້ງ ຂອງກະຊວງອຸດສາຫະກຳ ແລະ ການຄ້າ, ມີຖານະເປັນການເງິນຂັ້ນສອງ ຊຶ່ງມີພາລະບົດບາດໃນການຄຸ້ມຄອງວຽກງານສົ່ງເສີມ ວນກ ໂດຍການຄົ້ນ ຄວ້າສ້າງ, ປັບປຸງນະໂຍບາຍ, ແຜນພັດທະນາ ແລະ ກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ປະສານສົມທົບກັບບັນດາພາກສ່ວນຕ່າງໆ ເພື່ອຈັດຕັ້ງປະຕິບັດ.
ນອກຈາກນັ້ນ, ກສວ ຍັງມີບົດບາດເປັນອົງການຜະລິດຕະພາບແຫ່ງ ສປປ ລາວ ຕາມການມອບໝາຍຂອງລັດຖະບານໃນຖານະເປັນພາຄີຂອງສົນທິສັນຍາວ່າດ້ວຍອົງການຜະລິດຕະພາບແຫ່ງອາຊີ (Asian Productivity Organization-APO) ໃນການເຮັດບົດບາດເປັນອົງການຜະລິດຕະພາບແຫ່ງຊາດລາວ ເພື່ອປະກອບສ່ວນເຄື່ອນໄຫວໃນການບໍລິຫານອົງການ APO ແລະ ຮ່ວມມືກັນຈັດຕັ້ງປະຕິບັດໂຄງການດ້ານວິຊາການ ເພື່ອພັດທະນາຄວາມສາມາດໃນການແຂ່ງຂັນຂອງຂະແໜງຕ່າງໆ ໂດຍສະເພາະ ແມ່ນ SME ໃນຂະແໜງອຸດສາຫະກຳ, ກະສິກຳ, ການບໍລິການ ແລະ ຂະແໜງການອື່ນໆ.
ກສວ ຍັງເຮັດໜ້າທີ່ເປັນກອງເລຂາ ກອງທຶນສົ່ງເສີມ ແລະ ພັດທະນາ ວນກ (ທສວ) ຊຶ່ງເປັນການຈັດຕັ້ງການເງິນໜຶ່ງຂອງລັດ ທີ່ຂື້ນກັບກະຊວງອຸດສາຫະກຳ ແລະ ການຄ້າ ຕາມດຳລັດວ່າດ້ວຍກອງທຶນສົ່ງເສີມ ແລະ ພັດທະນາ ວນກ ສະບັບເລກທີ 123/ນຍ, ລົງວັນທີ 03 ມີນາ 2010. ຊຶ່ງເຮັດໜ້າທີ່ລະດົມທຶນຈາກຫຼາຍແຫຼ່ງທຶນທີ່ເປັນໄປໄດ້ ເພື່ອສະໜອງທຶນໃຫ້ແກ່ກິດຈະການສົ່ງເສີມ ວນກ ຕາມທີ່ໄດ້ກຳນົດໃນນະໂຍບາຍຂອງລັດຖະບານໃນແຕ່ລະໄລຍະ ບໍ່ວ່າຈະເປັນກິດຈະການສົ່ງເສີມທາງດ້ານການເງິນ ແລະ ກິດຈະການສົ່ງເສີມທາງດ້ານວິຊາການ.